“Basta, lassami stari!”,
ci lu gridò a la morti
ma non potti scappari,
signata era la sorti.

Di Stefanu Argintinu
la morti si truccau
e a Sara, stu Cainu,
la gula ci tagghiau.

Sara l’avia caputu
ca non avia l’onuri,
ca era un gran curnutu
e non ci desi amuri.

Ma chiddu la tistazza
l’avia di porcuspinu,
manciata, svacantata
di lu tilifuninu.

Campava a tempu persu,
senza sali e ragiuni,
ma a Sara lu perversu
rumpeva li cugghiuni.

Sara diceva forti:
“Non sì cosa pi mia”,
e non sapia c’a morti
a tagghiu la siguia.

E all’univirsitati,
jurnata d’a Passioni,
cu ddui gran cutiddati
ci desi la lizioni.

Sara stu munnu è persu
senza la tò bannera
non c’è cchiù l’universu
né Pasqua e primavera.